A do të zëvendësojë AI guidat turistike në të ardhmen?

Opinion – Lavdim Pepaj

A mund ta zëvendësojë AI guidën turistike?

Pasi që edhe vetë kam punuar guidë turistike për disa vite, mund të jap një opinion nga këndvështrimi im nëse Intelligence Artificial mund ta zëvendësojë një guidë turistike. Duke e ditur se si përgatitet një tur njëditor, që nga mëngjesi deri në mbrëmje, vetëm një guidë e di se sa e lodhshme dhe sa përgjegjësi ka ndaj turistëve e mos të flasim për një tur disa ditore. Një tur nuk është vetëm ecje nga një pikë në tjetrën, por është organizim, koordinim, komunikim dhe shpesh edhe zgjidhje problemesh të papritura gjatë ditës.

Ndoshta pyetja më e mirë nuk është nëse AI mund ta zëvendësojë një guidë turistike, por si mund ta lehtësojë AI punën e guidës. Sepse gjithmonë do të ketë nevojë për një person që udhëheq grupin, që krijon atmosferë dhe që kujdeset për eksperiencën e turistëve. Një aplikacion mund të tregojë rrugën, por nuk mund të menaxhojë një grup prej 20 apo 30 personash që kanë interesa, pyetje dhe kërkesa të ndryshme.

Nga përvoja ime, një guidë shpesh duhet të jetë njëkohësisht organizator, psikolog, përkthyes dhe ndonjëherë komedian e diplomat. Ka situata kur programi duhet të ndryshojë për shkak të motit, vonesave apo kërkesave të turistëve. Në këto raste, vendimet merren në moment dhe kërkojnë përvojë praktike që nuk është gjithmonë e programueshme.

Megjithatë, duhet pranuar se shumë turistë sot përdorin aplikacione dhe AI për të kursyer para, duke mos paguar ekstra për një guidë turistike. Me një telefon në dorë, ata mund të krijojnë itinerar, të lexojnë histori për monumente, të gjejnë restorante dhe të orientohen në qytet pa pasur nevojë për një person që i shoqëron. Kjo është një tendencë që në të ardhmen mund të ndikojë në mënyrën si ofrohen shërbimet turistike.

AI mund të ndihmojë guidat në shumë mënyra:

• përgatitje më të shpejtë të itinerareve

• informacione shtesë për destinacionet

• përkthim më të lehtë me turistë nga vende të ndryshme

• materiale vizuale që e bëjnë turin më interesant

Në këtë kuptim, AI nuk duhet parë vetëm si konkurrencë, por edhe si një mjet që mund të rrisë cilësinë e shërbimit. Guidat që do të dinë ta përdorin teknologjinë mund të ofrojnë eksperienca më të pasura dhe më profesionale.

Sidoqoftë, fakti që shumë turistë përpiqen të kursejnë duke mos marrë guidë tregon se industria duhet të përshtatet. Ndoshta guidat në të ardhmen do të fokusohen më shumë në ture tematike, eksperienca autentike dhe histori që nuk gjenden lehtë online.

Në fund, mund të thuhet se AI mund ta ndryshojë mënyrën si funksionon profesioni i guidës turistike, por vështirë se mund ta zëvendësojë plotësisht. Sepse turizmi nuk është vetëm informacion – është edhe komunikim, emocion dhe përvojë njerëzore.

Pyetja që mbetet është: a do të përshtaten guidat me teknologjinë, apo teknologjia do të ndryshojë mënyrën si udhëtojmë?