Rekreacioni nuk është luks, por investim në turizëm

Kur flitet për zhvillimin e turizmit, shumica e njerëzve mendojnë menjëherë për hotele, aeroporte, resorte apo restorante. Këto janë padyshim elementë të rëndësishëm, por shpesh harrojmë një komponent që në shumë vende të zhvilluara konsiderohet po aq i rëndësishëm: rekreacionin.

Një shteg për ecje në mal, një pistë biçikletash, një park i mirëmbajtur, një zonë për kajak apo një hapësirë për aktivitete në natyrë nuk janë vetëm vende argëtimi për banorët. Ato janë produkte turistike.

Në vende si Irlanda, Zvicra, Austria apo vendet nordike, investimet në rekreacion nuk shihen si shpenzim, por si investim afatgjatë. Çdo kilometër i një shtegu të mirëprojektuar, çdo pistë biçikletash dhe çdo park natyror krijon arsye që turistët të zgjasin qëndrimin, të konsumojnë më shumë shërbime dhe të rikthehen përsëri.

Në fakt, një turist që zgjedh një destinacion për ecje, çiklizëm apo aktivitete në natyrë zakonisht nuk shpenzon vetëm për atë aktivitet. Ai fle në hotel, ha në restorante, konsumon produkte lokale, përdor transportin dhe viziton atraksione të tjera. Kjo do të thotë se investimi në rekreacion gjeneron të ardhura për shumë sektorë të ekonomisë lokale.

Një tjetër përfitim është se rekreacioni ndihmon në zgjatjen e sezonit turistik. Ndryshe nga turizmi klasik bregdetar, aktivitetet si ecja në natyrë, çiklizmi, alpinizmi apo vëzhgimi i shpendëve zhvillohen gjatë pjesës më të madhe të vitit. Kjo krijon lëvizje turistike edhe në pranverë, vjeshtë dhe dimër, duke ulur varësinë nga vetëm dy apo tre muaj të sezonit veror.

Kosova dhe Shqipëria kanë një potencial të jashtëzakonshëm natyror. Male, liqene, lumenj, kanione, pyje dhe qindra kilometra peizazhe që mund të shndërrohen në destinacione rekreative. Megjithatë, në shumë raste mungojnë elementët bazë: shtigje të mirëshënuara, tabela orientuese, pika pushimi, hapësira parkimi, qendra informacioni dhe mirëmbajtje e vazhdueshme.

Shpesh dëgjojmë se duhen investime të mëdha për të zhvilluar turizmin. Në disa raste është e vërtetë, por jo çdo produkt turistik kërkon miliona euro. Ndonjëherë mjafton një shteg i projektuar mirë, një urë druri, sinjalistikë cilësore dhe një plan i mirë menaxhimi për të krijuar një atraksion që tërheq vizitorë gjatë gjithë vitit.

Përvoja e shumë vendeve tregon se turistët modernë nuk kërkojnë vetëm të bëjnë fotografi. Ata duan të ecin, të eksplorojnë, të lëvizin, të provojnë diçka të re dhe të kalojnë kohë në natyrë. Pikërisht këtu rekreacioni bëhet pjesë e ofertës turistike.

Në fund, rekreacioni nuk është luks. Ai është një investim në shëndetin e qytetarëve, në cilësinë e jetës dhe njëkohësisht në zhvillimin e turizmit. Çdo shteg, park apo pistë biçikletash e ndërtuar me vizion nuk u shërben vetëm banorëve, por mund të bëhet edhe arsyeja pse një turist zgjedh ta vizitojë atë destinacion.