Las Vegas po humb shkëlqimin: Turistët largohen për shkak të çmimeve të larta

Las Vegas, korrik 2025 – Një ndër destinacionet më të njohura në botë po përballet me një rënie të ndjeshme të numrit të turistëve. Sipas një analize nga MarketWatch, vizitorët janë duke u tërhequr për shkak të çmimeve të fryra dhe përvojës që nuk i justifikon më kostot.

Një kafe kushton deri në 9 dollarë, ndërsa një bufe mund të arrijë në 100 dollarë. Hotelet kanë rritur tarifat e fshehta, duke ndikuar në uljen e ndjeshme të rezervimeve – vetëm në qershor, kapaciteti i mbushjes ra me 14%.

Sipas New York Post, punëtorët e industrisë së mikpritjes po ndiejnë pasojat: të ardhurat nga bakshishet janë përgjysmuar, duke goditur veçanërisht kamarierët dhe shërbimet mbështetëse.

Të dhënat e publikuara nga këto burime sugjerojnë se modeli aktual ekonomik i qytetit nuk është më i qëndrueshëm, dhe në mungesë të një rikthimi në oferta më të balancuara, Las Vegas rrezikon të humbasë pozitën e tij si një prej qendrave kryesore turistike në SHBA.