Sa ndikon çmimi i biletës së avionit në zgjedhjen e destinacionit?

Le ta themi drejtpërdrejt: shpesh destinacioni nuk zgjidhet nga dëshira, por nga çmimi i biletës. Në teori udhëtari ëndërron Parisin, Barcelonën apo Romën. Në praktikë përfundon aty ku Ryanair, Wizz Air apo oferta e fundit online e çuan më lirë. Dhe kjo nuk është turizëm romantik – është turizëm i tabelës së çmimeve.

Çmimi i biletës është shpesh porta reale e hyrjes në një destinacion. Mund të kesh plazhe të bukura, male madhështore, kuzhinë fantastike dhe njerëz mikpritës, por nëse bileta kushton dyfish më shumë se destinacioni fqinj, loja mbaron aty. Turisti modern nuk pyet më “ku dua të shkoj?”, por “ku ia vlen me këtë buxhet?”.

Low-cost-et e kanë ndryshuar komplet hartën turistike. Disa qytete janë bërë të famshme jo se kanë zhvilluar strategji turistike, por sepse janë lidhur mirë me fluturime të lira. Ndërsa vende të tjera, me potencial të madh, mbesin jashtë loje sepse udhëtimi deri aty është i shtrenjtë, i lodhshëm ose i komplikur. Turizmi sot nuk matet vetëm me atraksione, por me aksesueshmëri ajrore.

Sigurisht, ka edhe një grup turistësh që nuk e shohin çmimin si kriter kryesor. Ata kërkojnë përvojë, cilësi, komoditet. Por le të mos mashtrohemi: masa vendos rregullat e tregut, dhe masa është e ndjeshme ndaj çmimit. Një destina­cion mund të jetë i mrekullueshëm në broshura, por i shtrenjtë në praktikë.

Prandaj, kur flasim për zhvillim turizmi, nuk mjafton marketingu dhe sloganet. Pa fluturime të përballueshme, promovimi mbetet reklamë bosh. Aeroportet, linjat ajrore dhe politikat e trafikut ajror janë po aq të rëndësishme sa hotelet dhe plazhet.

Në fund, destinacionet nuk humbin turistë sepse nuk janë të bukura. I humbin sepse janë shumë larg në çmim. Dhe në një botë ku pushimi planifikohet me kalkulator në dorë, bileta e avionit është shpesh ajo që e vendos vulën përfundimtare.