Sa real janë “super zbritjet” për pushime? Kur klienti besnik paguan më shtrenjtë

Autor: Lavdim Pepaj

Gjatë viteve të punës si guidë në Antalya, kam pasur mundësi të shoh nga afër se si funksionon tregu i paketave turistike dhe sa shumë mund të ndryshojnë çmimet për të njëjtin hotel. Shpesh turistët fokusohen te hoteli, dhoma, ushqimi dhe shërbimi, por shumë rrallë analizojnë nëse çmimi që kanë paguar është real apo thjesht i paketuar bukur me fjalën “ofertë speciale”.

Në fakt, unë personalisht nuk kisha ndonjë lidhje direkte me çmimet e paketave turistike, pasi kjo ishte pjesë e punës së operatorëve dhe agjencioneve turistike në Kosovë dhe vende të tjera me të cilat bashkëpunoja. Roli im si guidë ishte të kujdesesha për organizimin e qëndrimit, transferet, ekskursionet dhe të sigurohesha që pushuesit të shijonin pushimet – jo të bënin analizë ekonomike në lobby të hotelit.

Megjithatë, ishte e pashmangshme që gjatë qëndrimit në resort, pushuesit të bisedonin me mua ose mes vete për çmimet që kishin paguar. Kjo ndodh pothuajse gjithmonë në destinacione si Antalya, ku përveç diellit dhe detit, turistët shpesh zbulojnë edhe një sport tjetër: krahasimin e çmimeve të pushimeve.

Nga këto biseda ndër vite, isha mjaft mirë i informuar se cilat agjencione i shisnin paketat më shtrenjtë dhe cilat ofronin çmime më reale. Mbi të gjitha, e dija shumë mirë se deri në çfarë niveli mund të shkonte një ofertë për një resort në Antalya:

• gjatë kulmit të sezonit veror

• në periudhat jashtë sezonit

• në ofertat early booking

• në ofertat last minute

Me kalimin e kohës krijohet një pasqyrë shumë e qartë e tregut, sepse çdo ditë takon turistë që kanë rezervuar në mënyra të ndryshme dhe në çmime të ndryshme. Dhe ndonjëherë dallimet janë aq të dukshme, sa tema kryesore pranë pishinës bëhen çmimet e paketave

Rasti konkret: kur dy familje paguajnë çmime shumë të ndryshme për të njëjtin hotel

Një familje kishte rezervuar një paketë 7-ditore në një resort shumë të mirë në Antalya përmes një agjencioni turistik dhe kishte paguar një shumë të konsiderueshme parash. Pushimet kishin filluar normalisht edhe pse në momentin e hyrjes në hotel kishin pasur disa dyshime, sidomos për dhomën e cila nuk u kishte bërë ndonjë përshtypje të veçantë, vendosën të mos e bëjnë problem dhe të vazhdojnë pushimin, me shpresën se ditët në vijim do ta përmirësonin përvojën.

Pra gjithçka ishte në rregull… deri në momentin kur hyri në lojë pyetja klasike e pushuesve:

“Sa keni paguar për këtë hotel?”

Gjatë një bisede pranë pishinës, kjo familje u njoh me një familje tjetër që qëndronte në të njëjtin hotel. Fëmijët luanin bashkë, dhomat ishin shumë afër dhe nuk kishte ndonjë dallim në shërbime apo në standardin e qëndrimit.

Pra, teorikisht, gjithçka ishte identike.

Derisa u krahasuan çmimet.

Familja tjetër kishte paguar pothuajse gjysmën e çmimit për të njëjtën paketë 7 netë.

Në atë moment, dielli vazhdonte të shkëlqente, deti ishte po aq i kaltër, por atmosfera në tavolinë ndryshoi menjëherë.

Fillimisht menduan se ndoshta kishte ndonjë dallim:

• kategori tjetër dhome

• rezervim shumë më i hershëm

• ndonjë shërbim shtesë

Por pasi u krahasuan detajet, rezultoi se paketa ishte praktikisht e njëjtë.

I njëjti hotel, i njëjti ushqim, i njëjti plazh… vetëm çmimi ishte në një kategori tjetër turistike.

Takimi në hotel dhe një situatë e sikletshme

Pasi familjet biseduan mes vete dhe kuptuan diferencën e madhe në çmim, familja që kishte paguar më shumë më kontaktoi për një takim në hotel. Në momentin e parë që isha i lirë, shkova t’i takoj në lobby.

Me një shqetësim të dukshëm më pyetën drejtpërdrejt:

“A është në rregull ky çmim që kemi paguar për këtë resort?”

Në fakt, çmimi më dukej shumë i lartë për standardin e atij hoteli, por si guidë duhet të jesh shumë i kujdesshëm në këto situata. Sepse nëse i thua menjëherë klientit që ka paguar shumë më tepër seç duhet, pushimi mund të vazhdojë… por disponimi zakonisht përfundon aty.

Fillimisht u thashë se nuk kam informacion të detajuar se si është formuar çmimi i paketës së tyre, pasi kjo është pjesë e marrëveshjes mes klientit dhe agjencisë turistike.

Por ata më treguan se që në ditën e parë kishin njohur një familje tjetër në hotel, e cila kishte paguar pothuajse gjysmën e çmimit për të njëjtin resort.

Në atë moment u sugjerova që mënyra më e mirë ishte të kontaktonin direkt agjencionin ku kishin bërë rezervimin, në mënyrë që të merrnin një shpjegim prej tyre.

Ata vendosën ta telefononin agjencionin aty për aty, në praninë time.

Situata ishte mjaft e sikletshme, sepse nga përvoja ime e dija se çmimi që kishin paguar ishte shumë mbi nivelin real të tregut dhe se agjencioni kishte përfituar shumë më tepër nga kjo rezervim sesa ishte normale.

Agjencioni u përgjigj në telefon me një komunikim shumë të kujdesshëm dhe me disa arsyetime klasike të industrisë:

• kërkesë e lartë

• mungesë dhomash

• ofertë speciale

• periudhë e ngarkuar

Me pak fjalë, gjithçka përveç fjalës “po, çmimi është pak kreativ”.

Përpjekja për të gjetur një zgjidhje

Në atë moment ndërhyra me qëllim që të paktën të gjendej një zgjidhje praktike.

Duke biseduar me agjencionin, propozuam mundësinë e ndryshimit të hotelit, me arsyetimin se klienti nuk ishte plotësisht i kënaqur me zgjedhjen aktuale.

I propozova familjes 3–4 resorte të tjera që ishin edhe më të mira se hoteli ku po qëndronin dhe që, të paktën pjesërisht, do t’i afroheshin çmimit që kishin paguar.

Kushti ishte që familja të mos paguante asnjë shumë shtesë.

Pas shumë përpjekjesh dhe diskutimesh gjatë asaj dite, u arrit marrëveshja që hoteli të ndryshohej.

Edhe pse familja kishte paguar një çmim që realisht i korrespondonte një hoteli edhe më cilësor, kjo ishte zgjidhja më e mirë që mund të arrihej në atë moment.

Situata ishte edhe më e sikletshme për faktin se kjo familje kishte bashkëpunuar vazhdimisht me të njëjtin agjencion dhe kishte bërë rezervime të shumta në të kaluarën.

Pra, bëhej fjalë për klientë besnikë.

Në teori, klienti besnik duhet të marrë çmim më të mirë.

Në praktikë… ndonjëherë ndodh e kundërta.

Kur besnikëria shpërblehet… me çmim më të lartë

Një nga arsyet që shpesh nuk thuhet hapur, por që në praktikë ndodh, lidhet pikërisht me besueshmërinë dhe besnikërinë e klientit ndaj një agjencie turistike.

Shumë klientë bashkëpunojnë me të njëjtën agjenci për vite me radhë. Ata krijojnë një raport korrekt, komunikim të mirë dhe një komoditet që nuk kanë nevojë të kërkojnë alternativa të tjera.

Agjencia e njeh mirë klientin e vet:

• e di sa është në gjendje të paguajë

• e di që nuk bën shumë krahasime

• e di që rezervon shpesh

• e di që beson te rekomandimi i agjentit

Dhe këtu ndonjëherë fillon “kreativiteti” me çmimet.

Pra, klienti që beson më shumë, ndonjëherë paguan më shumë.

Ironikisht, klienti që është më korrekt dhe më i rregullt në bashkëpunim, ndonjëherë është pikërisht ai që paguan më tepër, sepse konsiderohet si klient që nuk do të bëjë shumë pyetje.

Besimi është një gjë shumë e mirë.

Por në turizëm, ndonjëherë rezulton se besimi pa krahasim të çmimeve mund të kushtojë disa qindra euro më shumë.

Balancë dhe korrektësi

Natyrisht, duhet theksuar se jo çdo agjencion vepron në këtë mënyrë ndaj klientëve besnikë. Ka shumë agjencione serioze që pikërisht klientët e rregullt i konsiderojnë si aset afatgjatë dhe bëjnë përpjekje që t’i ruajnë përmes:

• çmimeve më konkurruese

• këshillimit të sinqertë

• transparencës në oferta

• kujdesit për përvojën e klientit

Këto agjencione e kuptojnë se në turizëm fitimi afatgjatë është më i rëndësishëm sesa një përfitim i shpejtë nga një rezervim i vetëm. Sepse një klient i kënaqur kthehet përsëri, rekomandon agjencionin te miqtë dhe krijon një marrëdhënie bashkëpunimi që zgjat me vite.

Në fund, turizmi është një industri që ndërtohet mbi besim – dhe besimi ruhet vetëm kur klienti ndjen se është trajtuar me korrektësi.

Këshilla për turistët

• mos rezervoni ofertën e parë pa e krahasuar

• kontrolloni çmimet në 2–3 agjencione

• shikoni edhe platformat online

• kërkoni detaje të sakta të paketës

• mos u ndikoni vetëm nga komunikimi i mirë

• kërkoni ofertë me shkrim

• informohuni për çmimet mesatare të destinacionit

Sepse ndonjëherë diferenca mes një oferte “super speciale” dhe një oferte reale është vetëm fakti nëse keni bërë një telefonatë më shumë.

Antalya është një nga destinacionet më të organizuara në botë për turizëm masiv dhe zakonisht ekziston një interval i qartë çmimesh për çdo kategori hoteli.

Kur një çmim del shumë jashtë këtij intervali, zakonisht ka diçka që nuk është në rregull.

Pushimi duhet të jetë relaks, jo hetim financiar.

Sepse në fund, pushimet duhet të lënë kujtime të bukura… jo pyetjen:“sa kanë paguar të tjerët?”